Oliy tibbiy ta’lim tizimini modernizatsiya qilish, ta’lim sifati va amaliy ko’nikmalarni kuchaytirish maqsadida “Oliy tibbiy ta’limni rivojlantirishda raqamlashtirish va sun’iy intellektdan foydalanishning istiqbolli yo’nalishlari, erishilgan yutuqlar” mavzusida konferensiya bo’lib o’tdi. Tadbirda oliy ta’lim muassasalari, klinik bazalar, IT-mutaxassislar hamda amaliyotchi shifokorlar ishtirok etib, raqamli transformatsiyaning ta’lim jarayoniga ta’siri, sun’iy intellekt asosidagi yechimlarning imkoniyatlari va joriy etish mexanizmlari muhokama qilindi.
Konferensiyada tibbiy ta’limda elektron platformalar, masofaviy ta’lim modullari, raqamli simulyatsiya va virtual laboratoriyalar orqali kompetensiyaga yo’naltirilgan o’qitishni kuchaytirish masalalari yoritildi. Sun’iy intellektdan klinik fikrlashni rivojlantirish, tibbiy tasvirlarni tahlil qilish, standartlashtirilgan baholash hamda individual o’quv траektoriyalarini shakllantirishda foydalanish istiqbollari ta’kidlandi. Shuningdek, o’quv jarayonida katta ma’lumotlar (big data) asosida monitoring, akademik natijalarni tahlil qilish va ta’lim sifatini boshqarish uchun analitik yondashuvlarni joriy etish bo’yicha takliflar bildirildi.
Muhokamalar davomida erishilgan yutuqlar sifatida raqamli o’quv kontentini kengaytirish, klinik ko’nikmalarni baholashda zamonaviy usullarni qo’llash, ta’lim jarayonini avtomatlashtirish, shuningdek, diagnostika va davolash protokollarini o’rgatishda AI-yordamchi vositalar imkoniyatlaridan foydalanish tajribalari qayd etildi. Tadbir yakunida raqamlashtirish va sun’iy intellektni tibbiy ta’limga bosqichma-bosqich integratsiya qilish, kadrlar salohiyatini oshirish, axborot xavfsizligi va etik me’yorlarga rioya etish, hamda universitet – klinika – IT hamkorligini mustahkamlash bo’yicha amaliy tavsiyalar ilgari surildi.